قصة

يجب علينا ان ننتبه جيدا للاخرين ؛ حتى نستطيع ان نستفيد من تجاربهم السابقة ، كانها تجارب لنا ، وليست ملكا لهم فقط .

فعندما تتواجد مع مجموعة من البشر اى كانوا و اى كانت جنسيتهم او كنيتهم ، فاستمع جيدا وعى مايقال امامك علك واجد فيما يدور من احاديث مبتغاك كما حدث هنا :


بينما كنا جلوس فى صباح هذا اليوم ،وبعدما افرغنا ما بجعبتنا من احاديث اكثرها تافه لايتجاوز عن فلانه عملت وعلانه سوت ، اقبلت علينا هلينا وهى فتاة حديثة الزواج تعيش فى مركز المدينة، ولكن بحكم عملها جاءت الى قريتنا المتواضعة كى تمارس عملها ، هلينا طيبة الى ابعد الحدود قبل الزواج كانت هاتموت وتتزوج وفعلا قبلت اول طارق لباب بيت ابيها من غير تردد او تفكير.


كنت اعتقد ان النشئة خارج القرية تبرز عنها شخصية مختلفة شخصية تستطيع ان تتصدى للحياة وتاخذ منها ماتريد ولا تقبل ما تأبى رغم عنها ، ولكن هلينا اثبتت لى العكس فهى فتاة كما ذكرت طيبة جدا وهادئة الى ابعد الحدود لها صوت يشبة العرسه رفيع الى حد ما لا تستخدمه سوى مع المخلوقات الادنى منها فهى تنساه مع من هم ارقى منها من البشر واعنى رؤسائها فى العمل لاتابى اى عمل يفرض عليها سواء رغبت فيه ام لا ..


كفاية كدا كلام


فى هذا اليوم جاءتنا بمشكلة مع زوجها


هلينا : ( بصوت مسرسع وضحكة بلهاء )انا قررت اخد موقف، ونمت امبارح فى الاوضة التانية وسبته ينام لوحده


انا : لا .. والله ...من امتى ان شاء الله


( اصل هى من النوع الذى يريد ان يعيش بتتمنى لزوجها الرضا وهو مش بيرضا)


هلينا: ماهواللى قالى انه مش عايزنى انام معاه .. فطبعا خرجت ونمت فى اوضة تانية


( تتعالى ضحات الحضور جميعا فى شبه سخرية .. فجميعنا يعرفها جيدا ويعرف انها من السذاجة لدرجة تلبية اى طلب من زوجها او غيره بدون تردد منها .. اطلاقا )


مينرفا: انتى يابت هاتفضلى كدا موكوسة طول عمرك


هلينا : يعنى اعمل ايه اللفندى بقالوا اربع ايام مش بياكل فى البيت لانه زعلان منى


انا : اكيد ياهبله بياكل بره


هلينا : ( تشير بسبباتها علامة للنفى ) لا


دى عينه دخلت لجوه ومش عايزه تخرج تانى وتحت عينه كمان بقى اسود .. لا الراجل مش بياكل باين عليه انه هفتان .. اعمل ايه ياجماعة


منيرفا : (تشير الى هلينا ان تقترب منها اكثر .. على فكرة انا كنت لازقه فى هلينا على طول ) انت جربتى تصلحيه


هلينا : اكتر من مرة وهو برده مش راضى وبعدين دى مش اول مرة يحصل فيها كدا وكل مرة عينى بتطلع علشان اصلحه


منيرفا : علشان كدا ياهبله .. انتى اخدتيه على انك انتى اللى تروحى وتصلحيه.... خلاص مافيش امل هاتبقى كدا طول عمرك


فيفى : لا .. لا.. ممكن تغيره لسه بدرى هم مش اول سنه زواج


هلينا : ( بكل سذاجة ) ايوه


منيرفا : لا .. واضح انها عودته خلاص على كدا


فيفى : ولو برده ممكن تغيره


منيرفا : وانتى بقى لما تحبى تصلحيه بتعمله ايه ؟


هلينا : هاعمل ايه


بس مرة حطيت مكياج وكنت عايزه اصلحه وكدا يعنى ولبست وزبط نفسى .. راح باصص فى خلقتى ومدور وشه ونايم .. ولا كانى موجودة بالمرة ، روحت لابسة جلابية وخرجت من الاوضه


منيرفا : يعنى ايه هو حيطة؟ مش ممكن !!


طيب هو ايه نقطة ضعفه؟


هلينا : لا مالهوش نقطة ضعف.


منيرفا : انتى هابله .. كل راجل له نقطة ضعف .. والست النصحة اللى تعرفها علشان تخلص نفسها .


فيفى : ( موجهه حديثها لى ) وانتى ان شاء الله عمله كدا ليه مبرنقة عنيك ومطرطقة ودنك كدا ليه .. انتى لسه بدرى عليكى على المواضيع دى


منيرفا : سيبيها تتعلم .. احنا لسه هانعيده تانى .. خلينا نخلص


هلينا : انا هاعمل ايه


منيرفا : انا هاقولك على السر ونقطة الضعف عن كل الرجالة واللى هاقولك عليه تعمليه ومن سكات .


( تقترب هلينا اكثر من منيرفا وانا طبعا معاها زى خيلها كى تستمع للخطة وتستعد لتنفيذها )


لنا عودة