مساء الخير او صباحه عسل
مش مهم، ماانا مع نفسى اصبح عليها امسى عليها انا وهى احرار
مساء الخير يانفسى
( طبعا نفسى هاترد على )
نفسى : قولى صباح الخير وبلاش التوهان اللى انتِ فيه دا باستمرار
( انا بقى مش هاسكت لها طبعا )
انا : وبعدين بقى ماتهدى كدا وتصطبحى او تتمسى انا جاية افضفض معاكى حبتين تقومى تبكتى في كدا مش ممكن دا مش اسلوب حِوار
نفسى : خلاص عفونا عنك
هاه ايه الحكاية جاية ليه على ملا وشك كدا علشان ترغى معايا حصل جديد مع مُزِك ، اصل هو دا الموضوع الوحيد اللى بتحبى تتكلمى عنه
انا : مُزي (سرحان وتنهيده طويلة بحنية شديدة ) اه منه يامين يقولى ادخله منين ( ودينى ماانا عتقاه منى )
نفسى : خلاص فهمنا انه مش معبرك ومصدر لك الطرشة باستمرار ولاعمره فكر فيك، وكمان عارفين انك حبتيه لانه مرة قالك كلمتين مجاملة وانتى هصتى فى الهيصه وزطى
انا : ما باليد حيلة بحبه يانفسى وبعدين مش لاقى لى دواء ولا حل
اعمل ايه يانفسى .. (انتحر علشان تنبسطى )
نفسى : ايه الجديد يعنى ماانت على طول بتقولى كدا
انا : طيب ايه الحل من وجهة نظرك
نفسى : يابنتى اكسرى حاجز الصمت والجدار الفاصل بينك وبينه وقابليه واتكلمى معاه وشوفيه هو على ارض الواقع.. اتعملى معاه يعنى
انا : انت بتهذرى بقى على كدا
نفسى : كاتك نيلة بس هو يفضالك ويعبرك ويرضى يقابلك
انا : كمان
نفسى : ان كنت نسيتى افكرك
انا : ( بخباسة ) تفكرينى بايه
نفسى : لما طلبتى منه انك تقابليه واتحجج انه مش فاضى ..هاه فاكره ولا اكمل
انا : (باحراج ) مااااا ماهو ماكنش فاضى فعلا
نفسى : علي
انا : انا خايفة اصلا
نفسى : عارفه انك هاتموتى من القلق والخوف من رفضه لك
بس انت كدا يبقى عاملتى اللى عليك
ومنه تقطعى عرق وتسيحى دم
وفكرى وردى على
انا : وبعدين اعمل ايه، افكر فى ايه، اقابله؟ ان كنت اصلا بطلخبط واتبل وانا بكلمه من غير مااشوفه اقوم اقابله
قال اقابله قال.....
ياترى تعمل ايه؟؟
ليست هناك تعليقات:
إرسال تعليق